Todesanzeige
Fritz Weinberger
Scharnitz
04.12.2023
Kondolenzen
Neli
07.12.2023Lieber Opa,
ins zwoa ham sicha seltn die Worte gfahlt, aber i muas zuagebn: im Moment bin i echt a bissl sprachlos.
Vor zwoa Wochn sein ma zamm im Auto ghockt und ham auf die Mama gwartet und da hasch zu mir gsag, dass da eigentlich alls weh tuat und dass es gleich war, wenns iatz narat vorbei war. A Spruch wia viele in letzter Zeit. Im Stilln hab i ma dacht: “den Gfalln weat da is Universum nit so schnell tian, Opa” und zu dir hab i gsag, dass nit so redn sollsch, du weasch vermutlich nit 110 wean aba a poa guate Joa wean ma scho no ham. Sogar am Montag, wo i di im Kranknhaus bsuacht han, hat i no Wettn ogschlossn, dass du nägste Woch wieda hoamkimmsch. Du hasch zwoa nit guat ausgschaug, aber du hasch scho so viel er- und a überlebt, woasch so a richtigs Stehaufmandl, dass i ma sicher war, dass es des iatz no nit gwesn isch. Dass no nit alle deine Leben verbraucht hasch. “Mia segn ins morgen, Opa” han i gsag - i hab mi no nia so sehr geirrt.
Du woasch mit Abstand der Großelternteil vo dem i am Allermeisten ghabt hab. Nit nur an Zeit sondern a an Tiefe. Mia ham ins in die letztn Joa bestimmt mindestens oamal die Woch gsegn und i kann ma no goa nit vorstelln, wias iaz ohne di sein weat.
Wer soll denn iaz mit mir vorm Haus auf da Bank hockn und übers Leben, die Leit und in Sinn philosophiern? Wer dazählt ma iaz vo friaga und fragt mi, ob i mi eh no erinnern kann an damals, als war i vor 80 Joa scho dabei gwesn? Wer schaut denn iatz mit mir sehnsuchtsvoll auf insere geliebtn Tiroler Berg oder schwärmt mit mir vo andere Orte an de ma boade gwesn sein? Wer, frag i di, wer soll de Lücke denn füllen? I glab nit, dass des ebba kann. Du warsch oanfach einzigartig, a richtiges Unikat. Du warsch so viel. So a unglaublich großer Teil vom UNS.
Du warsch die Unterhaltung bei ins am Tisch - a wenn ins alle nit nach reden gwesn isch. Hasch ins mit deine, manchmal recht frechn Sprich allaweil zum Lachn bracht. Zugegeben: die Mama meistens a bissl weniger, aber ins dafia umso mehr. I muas heit no Schmunzeln, wenn i dran denk, dass mi am Todestag vo da Oma gfrag hasch, ob i eigentlich mit dem Griaßbrei den i dir kocht han is Bad nei verfugen mecht. Und wo i gfrag han, ob i da no a bissl a Milch einirian soll, hasch gmoant: nana iatz iss i den Mörtl scho fertig… eigentlich a tiafschwarzer Tag, und alle hamma schallend lachen miasn.
Du warsch da Glitzerstern an insam Himmel - dir wars so wichtig immer adrett und gepflegt zu sein. Wie viele Stunden du wohl im Bad verbracht hasch? Ma kann sie gar nit zählen. Aber dei Aussehen und die Parfumwolke de da jederzeit vorausgeeilt isch ham da recht geben, immerhin hat koana ders nit gwisst hat glabn kennen, dass du wirklich scho 90 bisch und wenn ma ganz ehrlich sein, dann warsch darauf scho ziemlich stolz. I bin froh, dass da des bis zum Schluss selba erhalten hasch kennen, genau so wias wolltesch.
Du warsch da Kitschkibl in insra Schublad - was hamma ins als Kinder diebisch gfreit wenn sogoa im Sommer dein Nikolaus auspackt hasch, der klingelnd übern Tisch marschiert isch oder wenn dein Spiagl gholt hasch, der jeden ausglacht hat, der einischaug. Oft hamma ins gfrag was wohl als nägstes zugleich Furchtbares und Lustiges daherbringsch und ham zgleich übers Augnrolln vo Mama und Oma gekichert.
Du warsch da Zauberstab in insra Trickkiste - i kanns goa koam dazähln wia langs dauert hat bis i gschnallt han, wia du wirklich die Kinig ausm Kartnstapl aussariachn kannsch und wieso da Bosco Biati echt alles kennt. I glab es hat ma sogoa die Mama irgendwann dazählt, so glaubhaft hasch du des ummabracht. A wenn i nit dei schauspielerisches Talent gerbt hab: des wea i irgendwann a amal meine Enkel zoagn und dabei mit am Lachn an di denkn.
Du warsch da Polizist in insam Garten - sinsch koana, aber du hasch imma genau gwisst wann wer wo wie vo ins hoamkemmen oda gangen isch. Wia oft hamma a no bei rabenschwarzer Nacht dei Taschnlampn beim Fenster oaleichtn gsegn, wenn nachm Rechtn gschaug hasch und wia schiach weats ins tian, dass es iatz dunkl bleibt.
Du warsch aber a da Opa, den andere gern ghabt hätten. Der monströse Schneeostereier und abenteuerliche Baumhäuser mit ins gebaut hat. Der mit Stolz jedem dazählt hat was seine Enkel alles kennen und der an insre wichtigen Tag nach Möglichkeit immer in da ersten Reih gstanden isch.
Und du warsch da beste Uropa den sich da Alexander hat wünschen kennen. Der gstrahlt hat wia a nuia Schilling, wo ma da an deim Geburtstag gsag ham, dass Uropa weasch. Der im Zwergal mit 1.5 Joa scho beibracht hat, dass er iam beim Begrüßen und Verabschieden die Hand gebn soll. Der imma glacht hat, wenn da Alexander wia a wildes Wiesel durchn Garten grennt isch und sich trotzdem die größten Sorgen gmacht hat, dass er hinfalln kannt. Der sich jedsmal irrsinnig gfreit hat, wenn iam da Alexander frech angrinst und dessn erste Frage es immer war ob er schlaft, wenn er nit sofort an Mucks von sich gebn hat... Du warsch der, der iam lieb ghabt hat, wia nur a Uropa des kann.
Opa, ganz im Ernst iatz: wer soll denn de Lücke füllen?
I sags da: niemand. Sie weat bleiben und jedsmal wenn ma se gspian, wean ma an di denkn und die Erinnerungen an di fest in insre Herzaln einschliaßn.
Du warsch der Großelternteil mit dem i am meisten Zeit ghabt hab und trotzdem war sie zu kurz. I hat ma mehr davon gwunschn,... na, i hab ma mehr Zeit mit dir erwartet. Damit muas i iatz leben lernen. Aber es gfreit mi fia di, dass iatz koan Weh mehr hasch. Es gfreit mi fia di, dass iaz wieda bei da Oma sein kannsch. Dass vielleicht endlich dein Buam kennenlernen darfsch und dafragsch was mit deim Bruada im Kriag passiert isch. Es gfreit mi fia di, dass iatz bei de bisch, de scho ganz lang vermisst hasch und es tröstet mi, dass ma ins dort eines Tages wiedersegn wean.
Mia behaltn di lieb, Opa
bis in die Ewigkeit
Neli